الرجيييم…. ام ……التكميم

[B]
تنتشر لدينا في الأونة الأخيرة ظاهرة التكميم لا الرجيم لعدة أسباب سنذكر بعضها.

هي: يا دكتور ماني قايمة من الكرسي الا لما تحطلي موعد عملية تكميم الحين الحين الحين يا دكتور
د.: يابنتي كتلة جسمك ما تعدي 36 كجم/م2 (كتلة الجسم =الوزن على مربع الطول) وماعندج أمراض مصاحبة للسمنة ليش أسوي لج بالله؟

هي:مالي شغل أسويها أسويها. يعني باجي البنات أحسن مني؟
د.: مو مسألة منافسة أهية ولا لعبة كوت بوستة هذي عملية مو دامة أشيل وأكل سوي رجيم وغيري طريقة اختيارج للأكل راح تضعفين وحركي جسمج ينزل وزنج وبس!
هي: ماااااالي خلق دكتوووور
د.: يا بنتي مع العملية لازم تسوين بعد رياضة ورجيم مو بس عملية يوم واحد وخلاص تنتهي المشكلة.
هي: شلون ؟؟؟!!! مو بسسسس أسوي عملية وخلاص ما أقدر أكل غصبن عني وأضعف وانحلت المشكلة صح؟؟
د.: لاااا يابنتي خل اشرح لج العملية وايجابياتها وسلبياتها وطلباتها بعد.
هي: تفضل دكتور
د.: أول شي لازم تسوين جم تحليل ومنظار وسونار واذا طلعوا كلهم تمام ويكون عندج زيادة مفرطة بالوزن ومعاه أمراض ثانية.
– إيجابيات العملية: تصغير حجم المعدة،يقل احساسج بالشبع، وتقل عدة الامراض المصاحبة للسمنة مثل الضعط والسكري وغيره.
– سلبياتها: نقص الفيتامينات ولازم تاخذين فيتامينات اضافيه في الفترة الأولى، دوخه، تساقط شعر، ألام، ترهل الجسم وطبعا تختلف نسبة هذي الأعراض من شخص لثاني.
هي: لاااا دكتور كلللش ولا الترهلات إذا زاد فستان حجم جلدي عن عضمي ولحمي شسوي ما ينباع بالمحلات فستان جلدي بشري، ولا أقدر أبدل جلدي مثل الحية بين الفترة والثانية وراح يصير شكلي مو حلو لا لا تقووول.
د.: ممكن تقللين من الترهلات ويشد جسمج بالسباحة بأول ثلاث اشهر بعد العملية وبعد هالفترة لازم تمشين يوم وتسوين رياضة اليوم الثاني وكافي ثلاث أيام مشي وثلاث أيام رياضة ،ولازم تعرفين يا بنتي أن التحكم بالوزن بعد العملية مشروع طويل الأمد مو بس عملية وخلاص لازم تابعين مع أخصائي تغذية بعد العملية ويرتب لك أكلك ويحسب لك السعرات الحرارية الازمة لج ولا يزيد وزنج بعد العملية بسنتين أو ثلاث.
هاااا رفيجاتج اللي سووا العملية زاد وزنهم مرة ثانية ولا لي الحين محافظين؟
المهم بعضهم يعتقد أن البطاط والشبس والكاكاو وجبات خفيفة وماتنحسب وهذا خطأ فهي صغيرة بحجمها كبيرة بطاقتها فيزيد وزن المريض ولما تسأله يقولك ما أكل شي … والصحيح هو أن ما ياكل شي صحي ومغذي وماعدل نمط حياتة فالرجيم وراج وراج وأنا أفضل تسوين رجيم ممتع الحين مع رياضة تحبينها وتستمتعين فيها أفضل من عملية وعوار راس على قولة المثل ( وين أذنك يا جحا قال هناك).
هي:ممم خل أفكر وأشوف. جنك أقنعتني دكتور.

بقلم : أخضائية التغذية العلاجية
فاطمه بومجداد

الإنستغرام
K8nutritionist@[/B]